تحويل مسار

شخص فقير مريض بالكبد وفي حالة متأخرة ، الدكتور كتبله علي حقن غالية لكن للاسف لسوء حالته المادية معرفش يشتريها ، لكن ربنا بعتله اللي يقدر يساعده ويشتريله الحقن
اكتر من سنة ونص الراجل الثري بيجيب حقن للراجل الفقير علي امل انه يخف
خصوصا ان الراجل الفقير كان شغال عند الراجل الغني ومعروف ان معندوش اي مصدر تاني للرزق يشتري منه الحقن
وبعد سنة ونص مات مريض الكبد، وبعدها بشهرين مات الرجل الغني
وهنا بدأ ابن الراجل الغني يسأل ربنا ، طالما حالته المادية ضعيفه ومش هيعرف يعالج نفسه ، رزقته بالمرض ليه! وليه بعد كل المصاريف اللي ابويا صرفها عليه ماشلتش عنه المرض !
وطالما كتبله الموت ، ماخدتش روحه قبل اول حقنه ليه !! وكنت وفرت علينا كل الفلوس اللي اتصرفت دي!!
وهنا سمع صوت من السما بيقوله : الراجل الفقير كان بعيد عني، والمرض هو اللي خلاه عرفني ويدعيلي ويصليلي ويقربلي
مكانته عندي كانت صغيرة ، لكن بنعمة الشكر والرضا اللي كان فيها، كبرت اوي ونال مكان مكانش يتوقعه، ووالدك الغني كان قدامه طريق طويل علشان يغير مساره ومكانته فوق من الضلمة للنور ، والعطية اللي قدامها بكل محبة كانت سبب كبير في ان طريقه يتغير والظلام يتحول نور
الاتنين في حضني وفي مكان حلو خالص
واحد جه بقطر الرضا والشكر ، والتاني جه بقطر العطاء بفرح
انتوا بتبصوا للارضيات ، لكن انا يهمني السماويات ، انتوا بتبصوا للبدايات لكن انا يهمني النهايات
لو جاتلك فرصة تعمل خير ، اتشعلق فيها
جايز تكون السلمة الاخيرة اللي هتوصل من خلالها لطريق الملكوت
ولو جالك المرض او وقعت قي ضيق ، قابله بفرح ، لانه هيكون الصنارة اللي هتنشلك من الضلمة للنور
ربنا بيبعت اختبارات طول الوقت ، ويابخت اللي ينجح فيها