الفزع والخوف من كورونا

إحنا داخلين  واحدة من أكبر التجارب النفسية وأبشعها في التاريخ.
الخوف من الوباء بيغيرك سيكولوجيًا دون أن تشعر.. سواء كنت شخص عادي أو من الساسة.. في مركز صنع قرار.

لاحظت مؤخرًا أن الناس بقت بتعلق أحيانًا تعليقات غريبة؟ بتتكلم بدون مصادر.. بقت في ناس هجومية أكتر من اللازم.. وأن البعض عين نفسه كقضاة على الآخرين؟ لاحظت أن في ناس لها أحيانًا ردود أفعال مبالغ فيها أو مش مفهومة؟

الخوف من العدوى.. من الفقر الناتج عن الأزمة الاقتصادية.. من الموت والمستقبل.. بيحور نفسيتك.. ويخليك تتصرف بطرق غير عادية.. وتبقى ردود أفعالك غير عادية.

القلق المتواصل لشهور له تأثير على الصحة العقلية.. أحكامنا بتبقى أقسي.. بنبقى عرضة للثورة والانفجار على أتفه سبب.. وبنبدأ نصاب بالبارانويا تجاه الغرباء. وساعات تجاه الأقربين. حتلاقي ردود الأفعال "أوفر" شوية.. وفي شحن وكهرباء في الجو مالهمش مصدر.

العاملين في المجال الصحي أكبر ناس من ضمن كل الفئات عرضة لكل ما سبق.. حتى لو كانوا بيحبوا وظائفهم.. العدو اللي بيحاربه موظف القطاع الصحي في المستشفي والمعمل.. عدو خفي.. شبح قاتل مخيف، ممكن يكون في الهواء حواليه.. ممكن يتسلل من على اطراف اصابعه إلى جسده.. ممكن يعلق بملابسه وياخده البيت لأطفاله.

هنا هو مختلف عنك، أنت خايف من العدوى.. هو في قلب العدوى.. أنت خايف على أطفالك من الفقر.. هو ممكن يموت ويتركهم فقراء ومصابين معًا... قصص كتير.

الموضوع مش بيقف عند الطبيب.. بيبقى على كل العاملين في القطاع ده.. لك أن تتخيل أن وظيفة "جامع العينات Pathology collector".. اللي بياخد منك مسحة أو عينة دم.. دي واحدة من أخطر عشر مهن، في العالم أجمع منذ عرف العالم البكتيريا.. من قبل حتى ظهور فيروس كورونا.

كل الناس دي مضغوطة بشكل لا يطاق.

في اللحظة دي مفيش مانع من لعبة إبليس الأبدية.. أنتوا مهمشين الدولة متجاهلاكم والمجتمع مش حاسس بيكم.. فتيل بس يتشد عشان يبدأ بعضهم يثور.. وتنتقل النيران من واحد إلى آخر.. ويتحول الأمر لنزعة قبلية.. ودا يزود الضغط أكتر.. ويسرع بالانفجار.. اللي حينتهي فيه الطبيب والمريض معًا.. لأننا في خندق واحد.

في الظروف دي يجب أننا نهدي بعض.. ونفهم أن الظروف سيئة والكل متوتر.. في الدنيا كلها. إحنا مش بنمن على الناس بشغلنا.. في أي قطاع.. صحة، تعليم، بناء.. كلنا في خندق واحد.

متخلوش حد يقسمكم لقبائل ويهيجكم على الدكاترة ويهيج الدكاترة على التمريض والتمريض على الصيادلة والناس العادية على الفنان والفنان على السياسي.. عشان دا خراب مستعجل.. تاني.. كلنا في خندق واحد. والعملية مش فلوس ولا نفوذ.. الهند والصين بيخبطوا في بعض على الحدود.. يعني ممكن نصحى وسط حرب نووية الصبح بدون سابق إنذار.

من غير تمريض مفيش طبيب.. من غير الطبيب مفيش فلاح.. من غير الفلاح مفيش رغيف ياكله الفنان.. ومن غير الفنان الدنيا تتخرب.. من غير فن وموسيقي وأدب الناس تقطع بعض وتتحول لوحوش برية.. من غير صيدلي مفيش دوا.. ومن غير مهندس مفيش بيوت ولا تكنولوجي ولا انترنت ولا ميكروسكوب.. يعني مفيش طب.. يعني حنعيش في كهوف.. ومن غير رجل الأمن مفيش كل ده.. مفيش ارض ولا وطن ولا بلد أساسًا.. حنموت قبل حتى ما نشعر بالجوع..

فنهدا بقى شوية.. ونحاول نحافظ على بعض.. ونحاول نتفهم اللي بنمر به.. ولما ردود أفعالنا تبدأ "تأفور".. نفتكر ونهدا.. دا مش احنا ولا دي طبيعتنا.. دي ظروف بنمر بيها...

نحاول نفتكر دا ونرجع لعقلنا وقت الانفعال.. عشان لو خربت حتخرب على الكل.

تعليقات

إرسال تعليق

المشاركات الشائعة من هذه المدونة

نبات الزوفا

نسمع عن نبات الزوفا في الكتاب المقدس وفى مزمور 51 نقول"طهرني بالزوفا" ؟ ذكرت الزوفا تسع مرات في العهد القديم (خر 12: 22، لا 14: 4 و6 و49، عد 19: 6 و18، 1 مل 4: 13، مز 51: 7)، ومرتين في العهد الجديد، فنقرأ في إنجيل يوحنا: "وكان إناء موضوعاً مملوًّا خلاً، فملأوا اسفنجة من الخل ووضعوها علي زوفا وقدموها إلي فمه" (يو 19: 29). ويقول الرسول في الرسالة إلي العبرانيين: "لأن موسي بعد ما كلم جميع الشعب بكل وصية بحسب الناموس، أخذ دم العجول والتيوس مع ماء وصوفاً قرمزياً وزوفا ورش الكتاب نفسه وجميع الشعب، قائلاً: هذا هو دم العهد…." (عب 9: 19و20). وكان الرب قد أمر موسي قائلاً: "خذوا باقة زوفا واغمسوها في الدم الذي في الطست ومسوا العتبة العليا والقائمتين بالدم الذي في الطست" (حز 12: 22)، وكان هذا أساس الفصح. والإشارة في المزمور الحادي والخمسين: "طهرني بالزوفا" (مز 51: 7) تشير بكل وضوح إلي رش دم الحمل لأنه "بدون سفك دم لا تحصل مغفرة" (عب 9: 22). وفي وصف الكتاب لحكمة سليمان، يقول إنه "تكلم عن الأشجار من الأرز الذي في لبنان إلي الز...
قراءة المزيد

انا بكره امى 1

صورة
أيوه متستغربوش كنت طفل عمره 12 سنه لما حصل خلاف حاد بين والدي ووالدتي نتيجة أزمة مادية كان بيمر بيها بابا ماما كانت بتصرخ في وش بابا جامد وبتتهمه أنه عاجز يكون راجل ويتحمل مسئولية بيت شوفت دمعة في عين بابا ساعتها رفض ينزلها وساب ماما ومشي من البيت لما شوفت في عيونه نظرة حزن وقلة حيله منح وعجز وهو مش عارف يتصرف ليلتها ماما زعقت فيا وطلبت مني أدخل أوضتي نمت بصعوبة وانا حزين على الحالة اللي وصل لها بابا وماما ولما صحيت كان بابا رجع من بره وسألني عن ماما قولتله معرفش هي راحت فين.. يمكن نزلت تشتري شوية طلبات من بره وجايه.. ماما اتاخرت ومرجعتش ..واكتشفنا بعد كدا انها سابت جواب بخط ايدها بتقول فيه سامحني مش هقدر اكمل معاك.. انا هبعد وهعيش حياتي واحاول اعوض نفسي عن اللي فات من عمري معاك ماما اتخلت عني وبعدت في اكتر وقت انا محتاجها فيه ليه كدا انا بحبك ..حرام عليكي بابا دور عليها في كل مكان لكنها اختفت وملهاش اثر تعب نفسيا جدا.. كنت بشوفه بينهار كل يوم وهو بيحاول يبان متماسك قدامي رفض يتجوز وقرر يعيش عشاني انا وبس كنت الابن الوحيد.. رعاني كويس وكملت تعليمي واتخرجت.. ...
قراءة المزيد

فورة

قليل اللي يسمع باسم فورة فورة هو غلام جدعون كل ما ذكر عنه هو ايتين فقط في سفر القضاة 7 وَكَانَ فِي تِلْكَ اللَّيْلَةِ أَنَّ الرَّبَّ قَالَ لَهُ: «قُمِ انْزِلْ إِلَى الْمَحَلَّةِ, لأَنِّي قَدْ دَفَعْتُهَا إِلَى يَدِكَ. 10وَإِنْ كُنْتَ خَائِفاً مِنَ النُّزُولِ, فَانْزِلْ أَنْتَ وَفُورَةُ غُلاَمُكَ إِلَى الْمَحَلَّةِ, 11وَتَسْمَعُ مَا يَتَكَلَّمُونَ بِهِ, وَبَعْدُ تَتَشَدَّدُ يَدَاكَ وَتَنْزِلُ إِلَى الْمَحَلَّةِ». فَنَزَلَ هُوَ وَفُورَةُ غُلاَمُهُ إِلَى آخِرِ الْمُتَجَهِّزِينَ الَّذِينَ فِي الْمَحَلَّةِ. فورة برغم انه شخصية مجهولة ومختفية لكن هنتعلم منها كتير 1- فورة المعين فورة كان غلام جدعون وكان ملازم له وبرغم ان جدعون زي ما قال على نفسه انه وحيد وبلا قوة في عشيرته لكن فورة كان ملازم ليه لمساعدته 2- فورة المشجع اية 10 من سفر القضاة 7 تظهر فورة المشجع 10وَإِنْ كُنْتَ خَائِفاً مِنَ النُّزُولِ, فَانْزِلْ أَنْتَ وَفُورَةُ غُلاَمُكَ إِلَى الْمَحَلَّةِ, تخيلوا جدعون اللي ظهرله ملاك الرب وقال له انك هتخلص بني اسرائيل واعطاه اكتر من علامة يقول له لو كنت خايف خد فورة معاك يشجعك ...
قراءة المزيد