متلازمة الإسفنجة

متلازمة الاسفنجة
اسفنجة ، و ياريتها اسفنجة تمتص و بعدين تدي اللي خدته، دي بتاخد بس ، بتاخد علي طول ..

ده اللي بيسرق طاقاتك، و يخليك تحس باليأس و الضعف و الارهاق و عدم الإقبال علي الحياة و التوتر كل ما تشوفه أو تكلمه.. ده اللي بيخللي الدنيا ضلمة، ما يعرفش يشجع و لا يدي امل .. وجهه مقبوض و نفسيته قتمة و كلامه مرار؛ كل ما تقابله ياخدك و ينزل في حفرة و يسبيك هناك أو يقعد معاك يونسك!!

١-الغضوب الثائر، اللي بينفجر من اقل موقف ، علشان يسيطر عليك بالخوف منه و من عصبيته..

٢-شخصية المحقق، يقلقك من كتر السؤال و الاستجواب ، و يخليك في وضع استعداد علشان تدافع عن نفسك طول الوقت..

٣-شحات العواطف، اللي ما بيزهقش من الطلبات ، و يحملك مشاكله ووضعه..

٤-كثير الشكاوي و النقد ليك و لكل الناس..

٤-كاسر الخواطر اللي ما بيبلش ريقك بكلام حلو ..

٥-الغامض اللي يسيبك محتار تفهمه و تفهم كلامه بعد كل مناقشة..

تعمل ايه ؟؟
١-الحوار معاهم عاوز فن ، امتي ترد و امتي تسكت و امتي تغير دفة الحديث.. و ما تسترسلش في الكلام السلبي و النقد و سيرة الناس معاهم ..

٢-قلل من وقت الجلوس و الحوار و الجدال معهم ..

٣-ما تفكرش كتير في اللي قالوه و لا تكرره في عقلك علشان ما تتعبش..

٤-اوعي تتكسف تقول لأ أو تعبر عن مشاعرك و عدم رضاك..

٥-لو تقدر تجنبهم بذكاء و ما تتورطش معاهم في كلام او خروج او عمل ؛ و لو أكثر ذكاء ما تحسسهمش انك بعيد ، يعني ضحكة و سؤال و مجاملة صادقة من وقت للتاني ..