احتضن طفلك

بنتي كل لما تيجي من الحضانه تتعبني في عمايل الواجب، واول ما أفتح الكتب تعمل نفسها نعسانه
ولما اضغط عليها ، تكتب الحروف المنقطه" تمشي ع النقط" لكن انها تكتبها لوحدها " استحاله"
ولو ضغطت عليها بلاقيها كتبت حرف غير الحرف نهائي
طول مانا بزعق هي مش مركزة في الواجب، هي مركزة انا هضرب ولا لا ، ولما ضغطت عليها اكتر بدأت تعيط
المهم قررت اسيبها علي راحتها ، وبعدها بكم يوم وبدون اي مناسبة كانت بتلعب بمكعباتها عادي
وجاتلي معاها ورقة وكتبالي كل الحروف اللي معرفتش تكتبها وهو الكتاب قدامها
كتبتهم شفوي ولو وحديها دون اجبار او الزام مني انها تكتبهم ، وصلتلي رسالة " انا فاهمه بس خايفه"
كان قلم بالنسبالي ، وبصراحه كان احلي قلم منها علي وشي
طفلك عمره ماهايحس انه مميز طول مانت بتديله فوق دماغه ، وده لإنه ليه قدرات خاصة لازم تحترمها ماينفعش ابدا تقارنه بغيره ، ولازم تحترم مستواه العقلي في الفهم والإستيعاب
لان طول ماهو خايف منك وانت ماسكله العصايه ، قلبه هايفضل يدق ومش هايفكر الا في حاجه واحدة بس " الضربة جياله منين وإزاي يتفاداها"
مفيش حاجه اسمها ابني حلوف ، ابنك بيحس بكل ضربه بس هو بيضحك علشان عزة النفس بتتولد مع الطفل من صغره وبتكبر معاه ، فامتبقاش عامل زي " العربجي" اللي بيضرب الحمار جامد علشان يطلع المطلع ، ولاتفضل تضرب فيه ضربه والتانيه لحد مايعيط علشان تتأكد ان الضربه وجعته
لان مش معني انه ماعيطش من اول ضربه انها موجعتوش ، كل الموضوع انه فضل يتحمل علي قد مايقدر لحد ماستسلم للوجع
خليك حنين علي طفلك وطول بالك عليه لانه لو اتعلم بالضرب " هايحفظ" لكن لو اتعلم بالمسايسه " هايفهم" ، والفهم هو اللي بيطلع عباقرة
اما الحفظ بيطلع إنسان يادوبك فاهم لحد مايسلم ورقة الامتحان للمراقب
وماتنساش ان ابنك كائن ضعيف فابلاش تستقوي عليه