ازاى تتعاملى مع بنتك المراهقة
كتبت من كام يوم عن كيفية التعامل مع إبنك المراهق وفي الحقيقة لقيت تفاعل غير عادي
واللي عندهم بنات إعترضوا وقالوا عاوزين نتعلم ازاي نتعامل مع بناتنا المراهقات
تعالوا بينا ندخل على السهوكة وفقع المرارة
1- بنتك في بداية السن ده بتلاقي كل حاجة فيها بتتغير
صوتها بيرفع وينعم ويقلب على ماجدة الصباحي
وده هيستفزك أوي لكن كبري دماغك
هتلاقي جسمها بدأ ياخد شكل ومنظر
هتلاقي البنت مكسوفة من شكل صدرها
لكن كلميها وعرفيها أن ده علامة الأنوثة وأنها مش المفروض تتكسف منه وكمان عوديها تلبس البراه أو حمالة الصدر
" اللي هي السوتيان يعني " بدري وعرفيها أن عدم لبسها له ممكن مع الوقت يعمل ترهلات وشكل جسمها يبوظ
2- هتلاقيها بتطنش وبتكبر دماغها من أوامر كتير بتأمريها بيها
وده لأنك بتطلبي بصيغة أمر
لكن مثلا قوليلها متيجي ننظف البيت مع بعض
أنت إعملي كذا وأنا أعمل كذا ونشوف مين يخلص الأول
ولو أنت خلصتي الأول هزودلك مصروفك بكرا
بكرا وبس مش على طول علشان يبقى العرض ساري
ولو أنا اللي خلصت الأول تعمليلي كوباية ليمون ساقعة
ولما تحس إنك جادة هتتحمل المسؤلية وتتحمس وهتنجز وهتبدع
ولو لقتيها كروتت الشغل متقولهاش يامهمله يا معفنة ولا عمرك هتبقي ست بيت
لكن بمنتهى الهدوء عرفيها إزاي تعمله ومفيش مانع تعمليه أنت قدامها علشان تتعلم
3- متتعوديش صوتك يعلى عليها علشان متعلميهاش الصوت العالي لأن كل ما صوتك يعلى هي صوتها هيبقى أعلى وهتتطلع البنت شرشوحة
وعوديها على النظافة الشخصية الداخلية
ومش عيب تعرفيها كيفية تنظيف أماكنها الحساسة
علميها تغير اﻷندر مرتين يوميا وتغسله قبل متخرج من التواليت
وإستخدام مزيلات العرق والحموم اليومي ضرورة قصوى وده مش هيجي بالعنف والإهانة واتهامها برائحتها الكريهه وانها معفنة.... الخ
4- لما البنت تجيلها" Period " إتعاملي معاها بحذر شديد
يعني فهميها كيفية التعامل مع نفسها في الفترة دي وكيفية اﻹعتناء بنظافتها وراقبي سلوكها من بعيد وايه التغيرات النفسية اللي بتطرق عليها زي العصبية النوم الكتير الآلام اللي بتصحب ال Period وإتعاملي معاها بحكمة فائقة ومتعرفيهاش بالتغيرات الشهرية دي علشان متتوهمش
وعرفيها انه مش لازم حد في البيت يشوف لها بقعة
وإهتمامك بتعلم بنتك النظافة لا يقل أهمية عن مستقبلها الدراسي حضرتك
5- إوعي البنت تعمل خطأ وتتعملي معاها بغباء وكأنك عدوة لها
علشان متبعديش البنت عنك وتخوفيها منك
لكن لما تعمل خطأ إحكيلها قصة وهمية عن أن كان في بنت عملت كذا وكذا واتأذت جدا لان تصرفها كان خاطئ
خدي بالك القصة الوهمية اللي هتحكيلها إبعدي تماما عن الخيال العلمي حضرتك والحكاية تتصدق لأن الغرض منها انك توصلي فكرة متزنة للبنت
إبعدي تماما عن العقاب البدني والنفسي في المرحلة دي لأن البنت بتكون حساسة بشكل مذهل
لكن خلي عقابك زعل منها بدون عنف
التقليل من المصروف ومش كله طبعا لكن إخصمي نصه مثلا وبدون عنف وقوليها: ده اتفاقنا مع بعض من اﻷول
يعني خليها تكون راضية عن العقاب لأنه اتفاق مسبق
6- لما تلاحظي أن بنتك لها مكالمات مريبة متعرفيهاش إنك لاحظتي ده
لكن استعبطي وابتدي دوري وراها في أرقامها
ولما تكتشفي حاجة بلاش تكلميها بشكل مباشر علشان متتخضش منك
خدي بالك أسرار البنات بتكون أكبر وأعمق وأكثر بكتير من أسرار الأولاد
والبنت بتكون حريصة كل الحرص على سرها
علشان كده لازم تتعاملي بأسلوب خبيث وفيه ذكاء بس ناعم اللي يوصل للبنت انه اشطة وأنها مش في خطر
7- لما توصلي لمرحلة أنك خلاص قربتي البنت منك وصاحبتيها ووثقت فيكِ
وجت تقول ماما عاوزة أقولك حاجة...
"أنا صاحبت" والجملة دي بقت دارجة الأيام دي
على أيامنا كنا بنقول أنا حبيت
لكن دلوقت بقت أنا صاحبت
لما بنتك تقولك كدة إوعي تنزعجي
عادي جدا على فكرة
جملة شكلها مزعج لكن دي لغتهم دلوقت
لما تقولك كده خلي على وشك ابتسامة رضا مع بعض الكلمات الهادية زي "كبرتي وصاحبتي يا قلبي"
خديها في حضنك وحسسيها بالأمان وسبيها تحكي براحتها من غير أسئلة كتير لكن خلي كلامك كله بفرحة زي" هو اسمه إيه؟ شكله إيه؟
خلي الأسئلة المطروحة تكون خارج نطاق التحقيق وجمع معلومات
أنا عارفة إنك في الوقت ده هتبقي هتطقي من جنابك من الغيظ وعاوزة تبركي عليها تفطسيها
لكن امممسكي نفسك يا ساكينة وخليكي باردة
8- نيجي بقى لمرحلة الخروج والدخول والمقابلات
لما تيجي تلبس وتخرج بلاش تدخلي عليها وتقوليلها وانت على وشك غضب ربنا ورافعة حاجب ومنزلة التاني ومضيقة عينك وكأنك خلاص داخلة تقتلي البنت وتقوليلها: "على فين يا هدهد الجناين؟"
لكن سبيها تلبس وقبل متخرج قوليلها حبيبتي رايحة فين؟
ده أنا كنت لسة هقولك أنا زهقانة متيجي نخرج
وفي أثناء الكلام تكوني فعلا قمتي تلبسي
يعني متديهاش فرصة تعترض
أخرجي معاها صاحبي أصحابها الولاد والبنات
إعزميهم عندك يقضوا يوم كامل والعبي وأضحكي معاهم وجاريهم في حوارتهم التافهه
وبخبث راقبي نظرات بنتك مهتمة بمين أكتر
بتوجيه كلامها لمين وأوعي تاخد بالها
وبعدها ركزي في كلامك معاها عن الشخص محل اﻷهتمام بدعابة وهزار
خلي روحك خفيفة معاها
9- لما تيجي بنوتك تحكيلك عن مشكلة حصلت بينها وبين أصحابها بنات أو أولاد بلاش تعنفيها لو هي غلطانة
لكن قوليلها لو كنت عملتي التصرف ده كان هيبقى ألطف
ومتدخليش بشكل مباشر في حل مشكلتها مع أصدقائها
سبيها تغلط وتجرب وتخسر ناس وتكسب ناس وتكتشف الناس
لأن التجارب دي هتشكل شخصيتها
لكن كل اللي تعمليه اسألي إعرفي تطور الموضوع
فكرة أن البنت تفضفض معاكي ده مهم اوي وهيديها الثقة في كل تصرف هتعمله
10- لما تلاحظي أن بنتك حزينة وبتمر باكتئاب وحابسة نفسها
متقحميش نفسك بالسؤال " مالك؟ فيكي ايه؟ جرالك ايه؟ "
لكن خليكي صامتة وعلى وشك روح الحزن زيها وفي الرايحة والجاية تتبططبي عليها وتبوسيها وتقوليلها :
حد يزعل القمر ده وتسببها وتمشي وتغيبي وترجعي تتبطبي عليها وتمشي
بعدها البنت هتيجي تحكيلك وبرضه تستقبلي الكلام حسب حالة البنت
يعني لو بكت ابكي معاها لو انفعلت انفعلي معاها
مشششش عليها
التعامل مع البنات في السن ده عاوز كتالوج
ولكل أم عندها بنت أحب أقولها ربنا يصبرك على ما بلاكي
بس نفذي ال 10 نقاط دول
ولو نجحتي هتبقى أنجزتي إنجاز عظيم في حياتك
تعليقات
إرسال تعليق