بدون أدنى مبالغة

كلمتين واللى يزعل هو حر رغم انى مكنتش عاوز و لا حابب ادخل فى نقاش سياسى و اللي يعرفنى يعرف انى مش بتاع كلام سياسه و ان شغلى هو شغلى الشاغل بس .
 
 أنا عشت في البلد دي ٣٦ سنة  ... منهم ٢٩ في عهد مبارك .. ووقت يناير كنت عاقل راشد و مسئول عن شركه املكها و بيت ... يعني مش زي اللي بنشوفهم علي السوشيال ميديا مكنوش قلعوا البامبرز في ٢٠١١ و مش عاجبهم حد  ...

أنا مشوفتش حد بيتحاسب في البلد دي إلا من ٢٠١٤ .. ماشوفتش الرقابة الإدارية بتقبض على وزير و محافظ و وكيل و نائب محافظ و مستشار و لواء و رئيس جمارك إلا في آخر ٥ سنين .. مشوفتش و معرفتش معنى كلمة مفيش حد فوق القانون إلا آخر ٥ سنين .... (وللامانة لسه بردو فيه فساد لكن بردو في محاسبة) ...

في آخر ٥ سنين شفت و عاصرت و اشتغلت فى شبكة طرق ماتعملتش على مدار ٣١  سنة عشتهم قبل ٢٠١٤ ... مش عارف أحصرهم رغم انى كنت جزء من الشغل  ..

شوفت بعينى ١٤ مدينة جديدة و أكبر محطات كهرباء و يعني إيه إكتفاء ذاتي .. شوفت و اتعلمت يعني إيه محطات توليد كهرباء من الرياح و يعني ايه محطات طاقة شمسية آخر ٥ سنين ..  أنا اول مرة أسمع مصطلح إكتشاف غاز و إكتفاء ذاتي و وقف إستيراد و مصر مركز الطاقة المصدره لأوروبا ...

 شفت قناة سويس جديدة بتتحفر في سنة وقت ما كله قال مستحيل ومولها المصرين  من فلوسهم و حفرها المصريين .. شوفت أنفاق جديدة تحت القناه و نقل الحياة لسيناء .. شوفت سحارة بتنقل مياة النيل ل وسط سينا  ..

 شفت إحلال لقطارات السكة الحديد و لأول مرة أسمع إن وزارة النقل بتحقق أرباح مش خساير شوفت محطات بيتم تنفيذها على اعلى مستوى للمترو شوفت انشاء قطار سريع كهربائى بيربط بين القاهره و اكثر من محافظه ..

 أول مرة أسمع و اشتغل فى مشاريع صوب زراعية بجد و مليون و نص فدان و مزراع سمكية بحق و حقيقي ..

 لاول مرة مدن جديدة متخصصة .... مدينة الروبيكي للجلود و دمياط الجديدة للأثاث و مصانع رخام و أحجار في الجلالة و مصانع فوسفات و كيماويات و أسمنت .. يعني إيه مطارات جديدة و محطات تحلية مياة وصلت ل ١٢ محطة و لسه بتزيد كل يوم فى جديد..

 معرفتش يعني إيه إسترداد أراضي الدولة و كباين المنتزة من العصابة اللي كانت وخداها .. يعني إيه إزالة تعديات ع النيل و إخلاء العشوائيات و إستبدالها بمساكن آدمية .. شوفت اصدقاء ليه و هما بينفذو مدارس فى كل مكان فى الجمهوريه و انا نفسى كان ليه حظ تنفيذ جزء من المدارس دى فى الفيوم ..

أنا شفت المصريين بيتعالجوا من فيروس سي بالملايين مجانا بعد ما كانوا أعلى نسبة إصابة بالمرض و مصر بقت مركز إقليمي للعلاج من الفيروس الكبدي .. شفت قوائم الأنتظار إنتهت من المستشفيات .. و شوفت مستشفيات جديده بيتم بنائها و شوفت البيتم  رفع كفائته .. شفت حملة لصحة المرأة المصرية .. شوفت منظومه تأمين صحى شامل للمواطن المصرى تم تشغيلها تجريبيا فى محافظه بورسعيد و بعد كده هتعمم تدريجى على كل محافظات مصر تخدم الفقير زى الغنى ..

 في ٥ سنين شفت  إحتياطي نقدي بيزيد لرقم قياسي (٤٥ مليار ) رغم تحرير سعر الصرف .. شفت مرتبات موظفي الحكومة ما إتأخرتش يوم رغم كل اللي حصل بالعكس إتعملهم زيادات إستثنائية في ظل إجراءات إصلاح إقتصادية و كل ده ماشي بالتوازي مع بعضه و عارف برضو ان الموظفين لسه محتاجين زياده و تعديل مرتبات رغم ان انا و انتم شايفنهم مقصرين فى الشغل ..

 شوفنا كلنا يعنى إيه تنويع تسليح و شفت جيشي أقوى جيش في المنطقة و ضباطه و مجندينه و عساكره أخواتي حاميين عرضي و صاينينه .. شفت حاملات طائرات في مصر و غواصات في بحرية مصر .. عشت و شفت مصر بتصنع سلاحها و ترسانتها البحرية بتنتج كورفتات شبحية بأيادي مصرية .. شفت في معرض إيديكس يعني أيه سلاح مصري و مركبات مصرية  ..

وسط ده كله شفت مصر بتستضيف زعماء أوروبا و العرب في أول لقاء يجمعهم في شرم الشيخ و بيتقالهم متدخلوش في شئون مصر ..
شفت رئيس مصر مدعو وبقوة من جميع دول العالم لزيارة دولهم و إقامة علاقات اقتصادية معانا او لحضور مؤتمرات  دول العالم الأول ..... شفت بلدي على حق زعيمة أفريقيا و بتتكلم بإسمها في كل المحافل الدولية و "تحيا مصر" بتتقال في مقر الأمم المتحدة ..

 أنا شفت رئيس بيتسأل بتجيب فلوس المشاريع دي كلها منين مش بيتسأل وديت فلوس مصر فين و يوم ما سئلوه قالولو اصل بتعمل قصور للدوله ..
رئيس أجبر ضباط الجيش على إستقطاع مبلغ من مرتباتهم لصندوق تحيا مصر و علمنا نصبح على مصر بجنيه رغم اعتراض ناس على الفكره و سابو المضمون .. رئيس بيفاصل مع الشركات العالمية بالسحتوت بشهادتهم همه ..

عاوزني أسيب كل اللي شوفته بعيني في ٥ سنين و أصدقكوا ؟! عاوزني أكدب اللي ع الأرض ده كله و أصدقكوا ؟!

لما قال ماعنديش فواتير ل حد ماكنشي بيقولها هباءا .. بالعكس ده طلع للكل فواتيره القديمة .. مالوش فواتير عند حد ..

أنا بصدق السيسي و بصدق عيني و بصدق عقلي ..